Tejasvi Sanman Sohla 2024 : तेजस्वी सन्मान सोहळा २०२४

तेजस्वी फाऊंडेशन सामाजिक संस्थेचा ‘तेजस्वी सन्मान सोहळा २०२४’ हा सोहळा नुकताच मराठी ग्रंथ संग्रहालय, ठाणे येथे पार पडला. सामाजिक साहित्यिक, शैक्षणिक आणि पत्रकारिता या क्षेत्रात अटकेपार झेंडा रोवलेल्या २० तेजस्वी ताऱ्यांना या सोहळ्यात सन्मानित करण्यात आले. सोहळ्याला प्रमुख पाहुणे म्हणून सुप्रसिद्ध मराठी कलाकार, दूरदर्शन वरील ‘गप्पागोष्टी’ कार माननीय जयंत ओक साहेब उपस्थित होते.

हा कार्यक्रम म्हणजे देवापुढे ठेवलेल्या पंचामृतासारखा

तेजस्वी सन्मान सोहळा २०२४ हा अत्यंत देखणा, आटोपशीर आणि शिस्तबद्ध रीतीने आयोजित केलेला कार्यक्रम म्हणजे देवापुढे ठेवलेल्या पंचामृतासारखा आहे, इतर कार्यक्रमाप्रमाणे त्याची मिसळ झालेली नाही, असे प्रतिपादन ज्येष्ठ रंगकर्मी, अभिनेते आणि ‘ गप्पागोष्टी ‘ कार श्री जयंत ओक यांनी केले.

तेजस्वी फाऊंडेशन तर्फे आयोजित तेजस्वी सन्मान सोहळा 2024

ठाणे, मराठी ग्रंथ संग्रहालय येथे तेजस्वी फाऊंडेशन तर्फे आयोजित तेजस्वी सन्मान सोहळा 2024 या भव्य कार्यक्रमाच्या अध्यक्षपदी विराजमान मा.श्री जयंत ओक आपल्या भाषणात पुढे म्हणाले, “प्रज्ञावंतांचा सन्मान प्रज्ञाच करू जाणे! समाजात प्रत्येक स्तरावर आपापल्या क्षेत्रात झोकून देऊन काम करणारे अनेक गुणवंत असतात. त्यांना ओळखून, त्यांच्या कार्याचा प्रसार करून, त्यांचा यथायोग्य सन्मान करणे गरजेचे असते, जेणेकरून त्यांना आयुष्याच्या पुढील वाटेवर काम करताना अजून हुरूप येईल, उत्साह येईल.

तेजस्वी फाउंडेशन ही वृध्दाश्रम, अनाथाश्रम, अन्नछत्र, आदिवासी शाळा, ग्रामीण भागातील मराठी शाळा अशा समाजाच्या विविध सामाजिक स्तरावर मागची दहा वर्षे सातत्याने मदत करणारी प्रा. प्रज्ञा पंडित आणि मनिष पंडित यांची संस्था आज समाजातील गुणवंतांचा सत्कार करत आहे ही खरोखरच कौतुकास्पद बाब आहे. एरवी सोहळ्यांमध्ये दिसणाऱ्या भपकेबाजपणाची मिसळ न करता समाजासाठी झटणाऱ्या कर्तृत्ववान व्यक्तींसाठी केलेले हे पंचामृत आहे.”

तेजस्वी समाज भूषण, साहित्यिक, पत्रकार

वंदे महाराष्ट्र (Vande Maharahstra) ला मिळालेल्या वृतानुसार तेजस्वी फाऊंडेशन तर्फे आयोजित केलेल्या या सन्मान सोहळ्यात डॉ. श्रीराम पंडित, दत्ता खंदारे, डॉ. संजय नागावकर, चंद्रकांत घाटगे, शशिकांत सावंत, अशोक कांबळे, निलेश राऊत, हिरालाल साळी (लोखंडे) यांना ‘तेजस्वी समाज भूषण’ हा पुरस्कार देऊन सन्मानित करण्यात आले. तसेच राजीव प्रधान, अर्चिस जोशी, काळूदास कनोजे, नारायण गाडेकर, सुरज अनभवणे, जितेंद्र गिरासे, अनुजा संखे, अमोल निरगुडे, प्रा. साईप्रसाद कुंभकर्ण, रुपेश महाडिक यांना ‘तेजस्वी साहित्यिक’ तर रवींद्र माने यांना ‘तेजस्वी पत्रकार’ या पुरस्काराने गौरविण्यात आले. कार्यक्रमाचे प्रमुख अतिथी श्री अशोक पाटील यांनी पुरस्कारार्थीना शुभेच्छा दिल्या. या देखण्या कार्यक्रमाचे प्राजक्ता जोशी यांनी सुंदर निवेदन केले.

कलात्मक वस्तू सवलतीच्या दरात

‘स्वरचित आर्ट्स’ या उद्योग संस्थेच्या स्वप्ना नाईक यांनी आपल्या संस्थेतील कलात्मक वस्तू सवलतीच्या दरात पुरस्कारार्थीना उपलब्ध करून दिल्या.